Аивадон разамонæг Лазарты Таймуразы æмхъуыдыгæнджытæ иу хаттæй иннæ хатмæ æрæмбырд кæнынц æнæхъæн залтæ. Хихъæппæрисадон артисттæ Баситы Асланы, Годжыцаты Георгийы, Гозымты Русланы, Сидахъты Дзамболаты, Чертыхъоты Астемыры, Булацаты Викторияйы, Хуыгаты Фатимæйы курдиатæн аргъгæнджытæ фæхудынц нæ царды хъæндзинæдтыл, уыцы-иу рæстæг сæ аиуварс кæныныл сагъæс кæнгæйæ. Ног азы кадæн "амранонтæ" цалдæр хатты равдыстой коллективы авторон уацмыстæй конд ногазон сатирикон-драмон архайд "Фыдджын æви гамбургер?".
9 январы æвдыст архайд у хицæнæй фæнысангæнинаг. Иннæ хæттытæй хъауджыдæр дзы ивддзинæдтæ, мыййаг, нæ уыд. Фæлæ уал развæлгъау сценæмæ рацыдысты Ирон театры аивадон разамонæг Цæриаты Валери æмæ "Амран"-ы аивадон разамонæг Лазарты Таймураз.
Ирон театрыл ацы аз 70 азы æххæст кæны, æмæ уый фæдыл арфæтæ ракæнгæйæ, Лазары-фырт фехъусын кодта, уыцы боны концертмæ "рцæуæг æхца æрвыст кæй æрцæудзæн театры фондмæ. "Нæ коллектив арæзт у хихъæппæрисадон артисттæй, æмæ зæгъын: нæ ахуыргæнæг у Ирон театр. Бузныг уын. Нæ чысыл æххуысы хай уын рæстмæ фæуæд, нæ хъæппæрис иннæ коллективтæ дæр бафæзмæнт. Уæ аивадуарзджыты нымæц фылдæргæнгæ цæуæд!" - загъта уый.
Царийы-фырты дзуапп уыд ахæм: "Нæ театр у ирон адæмы хæзна, æмæ йæм сабырдзинадæй хайджынæй цæуæнт. "Амран" дæр æнтыстджын уæд, йемæ æмгуыст кæндзыстæм амæйфæстæмæ дæр. Махæн нæ цард аразгæ у адæмы мидбылхудтæй, æмæ нын æй ма хæлæг кæнут!".
"Фыдджын æви гамбургер?"-ы та æрыгон артисттæ дзырдтой бирæ актуалон темæтыл. Кæстæрты размæ нæ уадзын, хи ирæттыл, дыгурæттыл, къуыдайрæгтыл дих кæнын, гæртæмттæ исын, закъоны сæрты хизгæйæ, æхца кусын, бюрократи парахат кæнын, ахуыр нæ кæнгæйæ, дипломтæ исын… Уыдæтты символтæ сты Лидианæ Сисиевна, Ирæфкæ, Знауыр, Ирбег, Кирпич Галев, Хъаз æмæ Харбыз, Льготбег Пособиев, Аптека Процедурова. Уыдонæн æмæ аивадуарзджытæн дæр (сæ бандæттыл гæххæтты гæбæзтæ æмæ æндæр бырæттæ кæй ныууадзынц, уый тыххæй) уайдзæф кæны Хæйрæг. "Алцы мæн аххос кæныны бæсты уæхимæ "ркæсут," - ахæм у йæ ныхасы хъуыды.
Спектаклы сæры сæйраг мидис та у, хион цæсты кæй нæ ахады, уый. Фыдджын гамбургер хонын байдыдтам, ирон æгъдæуттæ нæм талынг æмæ фæстæзад кæсынц. Уыимæ хи ронбæгъдæй дарын та хонæм раззагдæр европæйаг традицитæ фæзмын. Уыдæттæ раст кæй не сты, уый амоны ламбадæйы раивд "Хонгæ" кафтæй.
Ацы фарстатыл ахъуыды кæныны фадат ма уыдзæн, Ирон театрмæ 11-12 январы чи "рбацæуа, уыдонæн. Уый фæстæ "Амран" адæмы размæ рацæудзæн æрмæстдæр 6-8 мартъийы программæ "Æппын нæйы бæсты - чызг хуыздæр"-имæ.
Тъехты Т., "Рæстдзинад"